РусскийКыргызстан жана Австрия: жарандардын пенсиялык укуктары жөнүндө макулдашууга карай жол.
2026-жылдын 21-апрелинен 24-апрелине чейин Бишкек шаарында Кыргыз Республикасынын Социалдык фонду менен Австриянын компетенттүү органдарынын ортосунда сүйлөшүүлөрдүн экинчи айлампасы болуп өттү. Жолугушуунун жыйынтыгында тараптар эки негизги документтин: Социалдык камсыздоо жөнүндө макулдашуунун жана аны ишке ашыруу боюнча Административдик макулдашуунун долбоорлорун макулдашты. Бул кадам эки республикада тең иштеген жарандардын кызыкчылыктарын коргоо үчүн ишенимдүү укуктук базаны түзүүгө багытталган.
Келечектеги макулдашуунун негизги максаты — бир өлкөдөн экинчи өлкөгө көчүп барганда жарандардын эмгек стажы жоголбооруна кепилдик берүү. Документ бирдей мамиле жасоону камсыздайт: Австриядагы кыргызстандыктар жана Кыргызстандагы австриялыктар пенсия менен камсыз болууга бирдей укуктарга ээ болушат. Эки мамлекетте топтолгон камсыздандыруу мөөнөттөрү суммаланат, бул жарандарга социалдык камсыздандыруу тутумуна кошкон жалпы салымына ылайык төлөмдөрдү алууга мүмкүнчүлүк берет.
Сүйлөшүүлөрдүн жүрүшүндө эксперттер пропорционалдык принцип боюнча пенсияларды дайындоо жана төлөө механизмдерин деталдуу иштеп чыгышты. Ошондой эле тараптар ведомстволор аралык өз ара аракеттенүү тартибин жана камсыздандыруу төгүмдөрүн төлөөдө мыйзамдарды колдонуу жол-жоболорун аныкташты. Санариптештирүү маселесине өзгөчө көңүл бурулуп, маалыматтарды электрондук түрдө алмашууну киргизүү келечеги талкууланды, бул келечекте документтерди иштеп чыгууну бир топ тездетет.
Жакын арада жетишилген келишимдерди иш жүзүндө колдонуу үчүн зарыл болгон документтердин формаларын бекитүү боюнча иштер улантылат. Мындай макулдашуу Кыргызстандын ЕАЭБ өлкөлөрү, Түркия жана КЭР менен социалдык камсыздоо чөйрөсүндөгү колдонуудагы келишимдерин толуктап, чет өлкөлөрдөгү биздин жарандарды социалдык жактан коргоонун географиясын кеңейтет.